За необврзувачката резолуција, која беше предложена од Соединетите Американски Држави и ко-спонзорирана од 122 други земји, се преговараше три месеци и предвидува зајакнување на приватноста, изјавија официјални лица на брифинг со новинарите пред усвојувањето на резолуцијата, објави АП.
„Ние пловиме во променливи води со технологија која брзо се менува, што значи дека е поважно од кога било да се владее во светлината на нашите вредности“, рече еден висок претставник на американската администрација, опишувајќи ја резолуцијата како „прв вистински глобален консензуален документ за вештачката интелигенција. .
Резолуцијата е последна во серијата иницијативи на владите ширум светот за да го обликуваат развојот на вештачката интелигенција поради стравувањата дека може да се искористи за да се нарушат демократските процеси, да се изврши измама или да доведе до драматично губење на работни места.
„Несоодветното или злонамерно дизајнирање, развој, имплементација и употреба на системи за вештачка интелигенција претставуваат ризици кои можат да ја поткопаат заштитата, промоцијата и уживањето на човековите права и основните слободи“, се вели во резолуцијата.
На прашањето дали преговарачите се соочиле со отпор од Русија или Кина, кои исто така гласале за резолуцијата, официјалните лица признале дека имало „многу жестока дискусија“. „Сепак, ние активно соработувавме со Кина, Русија, Куба и други земји кои често не се согласуваат со нас“, велат тие.
„Веруваме дека резолуцијата постигнува соодветна рамнотежа помеѓу промовирањето на развојот и продолжувањето на заштитата на човековите права“, рече еден од официјалните лица кој сакаше да остане анонимен.
