Колку МИЛИЈАРДИ ги чини странските компании ВРТЕЊЕТО НА ГРБ НА ПУТИН

Напуштањето на Русија по почетокот на конфликтот со Украина ги чинеше странските компании повеќе од 107 милијарди долари отпис и изгубени приходи, покажа анализата на Ројтерс на податоците на компанијата.

Обемот на загубите се зголеми за една третина од август 2023 година, што укажува на степенот на влијанието на руската инвазија врз корпоративните финансии.

„Додека руската агресија продолжува поради неконзистентната воена помош од Западот и зголемениот опсег на западните санкции, компаниите кои сè уште имаат за цел да излезат од Русија веројатно ќе се соочат со нови тешкотии и ќе мора да прифатат поголеми отписи и загуби“, изјави за Ројтерс Иан Маси, директорот за собирање податоци во консултантската фирма S-RM.

Маси потсети дека рускиот претседател Владимир Путин неодамна победи на претседателските избори и обезбеди обновен мандат за продолжување на понатамошната изолација од Западот, вклучувајќи дополнителни заплени на имот и политички притисок.

Москва бара попуст од најмалку 50 отсто на продажбата на странски средства и постојано ги заострува своите клаузули за излез од рускиот пазар, честопати прифаќајќи номинален надомест од само една рубља.

Од почетокот на 2024 година е најавена продажба на средствата на Шел, ХСБЦ, Полиметал и Јандекс со вкупна вредност од речиси десет милијарди долари и со попуст до 90 отсто, наведува Ројтерс.

Компанијата Данон пред една недела доби регулаторно одобрение за отуѓување на руски средства со вкупна загуба од 1,3 милијарди долари.

Околу илјада компании веќе ја напуштија Русија, но во таа земја уште стотина компании, според некои анализи, работат или го прекинаа работењето.

Од друга страна, западните земји ги замрзнаа златните и девизните резерви на Банката на Русија за околу 300 милијарди долари.

Германија ја национализираше фабриката на Гаспром и ја стави рафинеријата на Роснефт „под своја контрола“.

Русија вети дека ќе возврати по предлогот на ЕУ за пренасочување на милијарди евра камати од замрзнатите руски средства.

Меѓутоа, поради правни спорови кои можат да бидат предизвикани од каква било конфискација, збунети се и западните банки.

„Нема западни средства во Русија што може да се сметаат за безбедни“, посочи Маси.

Москва веќе ја презеде контролата врз имотот на неколку западни компании, вклучувајќи ги Фортум, Карлсберг и Џунипер, покажа анализата на Ројтерс.

Руската државна новинска агенција РИА пресмета дека Западот би можел да загуби средства и инвестиции во вредност од најмалку 288 милијарди долари доколку Москва одлучи да возврати. Таа сума одговара на директните инвестиции на ЕУ, Групата 7, Австралија и Швајцарија во руската економија од 2022 година.

Сепак, цврстиот став на Москва ѝ штети и на Русија, а експертот за санкции Џереми Цукер вели дека голем број клиенти на неговата фирма од различни индустрии одлучиле целосно да ја напуштат Русија и веројатно нема да се вратат таму дури и кога ќе заврши војната.

Како резултат на тоа, значајни технологии ја напуштија Русија и таа можеби повеќе нема да може да поддржува одредени високотехнолошки производство, изјави Цукер од американската адвокатска фирма Декерт за Ројтерс.