Секретарот на рускиот Совет за безбедност, Николај Патрушев изјави дека Украина стои зад терористичкиот напад на концертната сала „Крокус“ во предградието на Москва, пренесува руската државна новинска агенција <a href="https://ria.ru/20240326/ukraina-1935890845.html">РИА Новости.</a>
Новинарите го прашаа Патрушев дали зад терористичкиот напад стои Украина или терористичката организација ИСИЛ, која е забранета во Руската Федерација.
„Се разбира, Украина“, одговори Патрушев.
Патрушев, кој работеше со Путин во КГБ во Санкт Петербург, е познат по застапувањето на тврдокорните политики на Кремљ. Тој даде неколку интервјуа за руските весници во кои ја оправдува одлуката на Путин да изврши целосна инвазија на Украина.
Евгениј Аношин, портпаролот на Советот за безбедност, го опиша Патрушев како „патриот“ и „државен актер кој долги години е лојален на Руската Федерација и Путин“.
Патем, кога се зборува за потенцијалните наследници на Путин, името на Патрушев секогаш котира многу високо.
<b>Путин: Кој ги чекаше во Украина?</b>
Рускиот претседател Владимир Путин вчера изјави дека нападот го извршиле радикални исламисти.
„Знаеме дека злосторството го извршиле радикални исламисти кои имаат идеологија против која самиот исламски свет се бори со векови“, рече Путин на состанокот на владата, споменувајќи ја таквата врска за прв пат три дена откако Исламската држава презема одговорност за нападот.
„Знаеме кој го изврши ова злосторство против Русија и нејзиниот народ. Она што нè интересира е кој го наредил. Важно е да се одговори на прашањето зошто терористите се обидоа да заминат во Украина по злосторството. Кој ги чекаше таму?“ додаде тој.
