Министерството за внатрешни работи, во координација со Основното јавно обвинителство Скопје, продолжува да презема дејствија за идентификација на сторителите на кривично дело кога пред скоро две седмици матичен доктор беше избоден до смрт во кругот на Поликлиниката Железара.
Од Обвинителството велат дека продолжуваат со дејствија, со цел идентификација на сторителите.
-До овој момент, со преземените дејствија од МВР и извршените вештачења од Институтот за судска медицина не се обезбедени докази кои даваат основано сомнение дека лицата лишени од слобода се сторители на кривичното дело. Од тие причини, јавниот обвинител, по истекот на времетраењето на определената мерка краткотраен куќен притвор, нема да предлага судот да определи нови мерки за претпазливост за трите лица кои беа задржани во врска со овој настан, велат од ОЈО.
Министерството за внатрешни работи, во координација со Основното јавно обвинителство Скопје, продолжува да презема дејствија за идентификација на сторителите на кривично дело.
Скопје Инфо од извори во Министерството за внатрешни работи дознава дека днк анализите се целозавршени и нивното вкрстување треба да даде насока за можниот извршител на убиството, дополнително во изминатите денови сослушани се десетина лица кои во критичниот период имале директна или индиректна комуникација со убиениот. а за кои Министерството за внатрешни работи се сомнева дека можеби би имале некаква поврзаност со убиството. Од страна на форензичките тимови на полицијата прегледани се и 40-тина камери од околниот простор.
Во меѓувреме, органите на прогонот, во соработка со Основното јавно обвинителство Скопје, остануваат посветени на откривање на вистинските сторители на кривичното дело. Извори од полицијата брифираат дека истрагата напредува и очекува таа наскоро да даде конкретни резултати.