Започна уредувањето на просторат за „италијанскиот“ емигрантски камп во Албанија
Објавено во: Балкан 29 Март, 2024
Во Албанија на подрачјето на поранешната воена база во Ѓадер започнаа работите околу уредувањето и доизградбата на потребната инфраструктура за кампот за сместување на мигрантите кои ќе ги испраќа Италија.
- Во првата фаза се работи на асфалтирање на патот од Какариќ до Ѓадр, како и во внатрешноста на кампот. Се гради и заштитен ѕид висок неколку метри и се очекува овие работи да завршат првите денови од месец мај. До 20 мај кога се очекува да пристигне првата група бегалци, треба да завршат сте неопходни активности. Деновиве ќе почнат работите за прифатниот центар во Шенѓин, јави Топ чанел.
Работите се одвиваат со забрзана динамика за да се овозможи доизградба на сместувачките места, здравствен дом и други објекти, за да може да профункционираат на 20 мај, како што беше најавено.
Премиерката на Италија Џорџија Мелони и премиерот на Албанија Еди Рама во Рим минатата година потпишаа договор според кој Албанија ќе прима имигранти од Италија. Тие ќе бидат сместени во прифатни центри во крајбрежните градови, чија изградба ќе ја финансира италијанската влада. Во тие центри ќе можат да се сместат најмногу 3.000 луѓе. Она што се наметнува како клучно прашање, покрај она поврзано со човековите права, е и како тоа е законски регулирано и дали го прекршува законодавството на Европската Унија. Нејасно е и дали и како договорот меѓу овие две земји ќе се одрази на целиот регион на Западен Балкан.
Мелони и Рама потпишаа договор во Рим за сместување на имигрантите во специјални центри што ќе бидат формирани во Албанија. Конкретните детали од договорот се уште не се објавени.
Мигрантите, со исклучок на малолетни деца и бремени жени, кои пристигнале на италијанскиот брег или се пресретнати во морските води, италијанските власти ќе ги транспортираат до прифатниот центар во Шенѓин, каде ќе им бидат извршени здравствени прегледи и идентификација. Потоа ќе бидат транспортирани до кампот во Ѓадер каде мигрантите ќе треба да чекаат одговор на нивното барање за азил или евентуална репатријација, што би траело месец дена.