Израел го спречи иранскиот одмазднички ракетен напад, но експертите велат дека Иран може да ја искористи оваа загуба за да научи и да планира поефективен план.

Израел и неговите сојузници не можат да си дозволат да бидат задоволни, велат тие, пишува „Business insider“.

„Нападот веројатно му помогна на Иран да ги идентификува релативните силни и слаби страни на израелскиот систем за противвоздушна одбрана“, велат аналитичарите на Институтот за проучување на војната со седиште во Вашингтон.

Аналитичарите Брајан Картер и Фредерик Каган тврдат дека „Иранците ќе научат лекции од овој удар и ќе работат на подобрување на нивните способности да навлезат во израелската одбрана со текот на времето, како што Русите направија во повторените серии на удари против Украина.

Иранскиот воздушен напад врз Израел беше заснован на руската тактика во Украина, велат дел од познавачите.

На 13 април, Иран лансираше бараж од околу 150 проектили и 170 беспилотни летала кон Израел како одговор на израелскиот напад врз зградата на иранскиот конзулат во Сирија на почетокот на овој месец, во кој загинаа неколку официјални лица, што ескалираше долгогодишна војна во сенка.

Иранските проектили и беспилотни летала беа претежно пресретнати од Израел, неговите соседни земји и сојузничките сили, но експертите велат дека овој напад може да му понуди на Иран лекции за следниот голем удар.

Додека многу од иранските ракети и беспилотни летала беа пресретнати, бројот на оружја што успеаја да ја пробијат одбраната на Израел е доволно забележлив за загриженост.

Во иднина, ако Иран научи од своите победи и загуби во оваа размена, ова оружје „може да предизвика значителни цивилни жртви и штета на цивилната инфраструктура, вклучувајќи ги пристаништата и енергетските комплекси“.

„Руските напади врз Украина покажаа дека дури и мал број прецизни удари врз клучните јазли во енергетскиот сектор или друга инфраструктура може да предизвикаат непропорционални ефекти. Израел и неговите партнери не треба да излезат од оваа успешна одбрана со никакво чувство на самозадоволство“, велат од Институтот во Вашингтон.

Аналитичарите објаснија и дека стратегијата на Иран на некој начин е слична на тактиката на Русија насочена кон Украина.

Иранските беспилотни летала и крстосувачките ракети беа лансирани порано со цел да го погодат одбранбениот воздушен систем на Израел истовремено со балистичките ракети.

„Русите постојано користеа таков пристап против Украина“, се вели во извештајот. Целта на таквиот пакет е побавните крстосувачки ракети и беспилотни летала да го одвлечат вниманието и да ја преоптоварат противвоздушната одбрана за да им се овозможи на балистичките ракети, кои многу потешко се соборуваат, да стигнат до своите цели.

Со оглед на тоа што Иран ја отсликува стратегијата на својот партнер, експертите рекоа дека сега може да се консултира со својот партнер Русија и да се информира од руската војска за тоа како може подобро да ги оспори одбранбените системи што НАТО и САД и ги обезбедија на Украина.

Сепак, влошувањето на конфликтот меѓу Иран и Израел, исто така, може да им наштети на односите на Русија со Иран бидејќи Москва можеби нема да може соодветно да го поддржи Техеран, кој исто така не би можел да го понуди истото ниво на поддршка како што беше до сега, доколку се најде во поширока војна.