Дијана Иваноска со својот талент за комбинација на вкусови нè носи на едно исклучително гастрономско патување. Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.

– Го сакам секој дел од процесот, но најмногу уживам во фотографирањето на храната – ни открива Дијана.

Инвентивната Дијана денеска споделува рецепт за едно гастрономско уживање – посен чискејк со боровинки.

За кората:

– 120 грама бадеми сирови (потопени во вода преку ноќ)
– 45 грама лешници сирови (потопени во вода преку ноќ)
– 2 лажици кокосово масло (растопено)
– 1 лажица какао во прав
– 40 грама урми исчистени од семки
– сосема малку сол

За кремот:

– 300 грама индиски ореви сирови (потопени во вода преку ноќ)
– 1 шолја кокосов крем
– 1/2 шолја јаворов сируп (јас заменив по половина од количината со сируп од урма и агаве)
– 1/3 шолја кокосово масло (растопено)
– сок од еден лимон
– 2 лажички екстракт од ванила
– 1/8 лажиче сол
– 100 грама боровинки

Подготовка:

Бадемите и лешниците се прецедуваат од водата и заедно со другите состојки за кората се мелат во процесор за храна или во блендер.
Се натапкува смесата на дното од калапот за чискејк.
Индиските ореви се процедуваат од водата и заедно со состојките за кремот се блендираат додека добиете кремаста смеса.
Кремот се сипува врз кората и се удира нежно калапот од работната маса да се израмни смесата и да излезат на површина меурчињата со воздух, доколку ги има.
Чискејкот се лади во фрижидер неколку часови или преку ноќ. Од оваа количина излегоа 6 мали чискејка и еден во округло тавче 18 см.
Уживајте!