Билетите „летнаа“ само по неколку часа откако беа пуштени во продажба, па големиот интерес беше прва најава дека двата концерта „MTV The Greatest Hits 80’s & 90’s Volume 2“ во Битола ќе бидат специјални. Викендов, полните сали и насмеаните лица беа неспорен доказ дека Камерниот оркестар на Битола ⋮IWConnect во континуитет продолжува да е во срцето на незаборавни музички доживувања.
Љубителите на музиката, коишто беа доволно брзи за да си обезбедат присуство, станаа сведоци на оживување на духот на 80-тите и 90-тите години, преку хитови кои беше невозможно да не си ги потпевнуваат.
Покрај незаборавните песни на Тина Тарнер, Мајкл Џексон и Тони Брекстон, присутните имаа можност да се потсетат и на дел од најдобрите рок хитови кои ја обележаа златната доба на легендарните Guns N’ Roses, Queen и многу други, изведени во оркестарски аранжман.
Композициите беа во изведба на Ирена Димовска, Полина Тасева, Агни Авшар, Ана Петановска, Јасна Димитровска, Мила Николовска, Огнен Димовски и специјалната гостинка Donna Marina Martensson – женскиот вокал на светски познатата авангардна музичка група Лајбах, поп-рок хорот БИТВОКС, балетски играчи-солисти при Национална опера и балет, како и членови на КУД Илинден.
Проектот „MTV The Greatest Hits“ дебитираше минатата година и инстантно привлече огромно внимание, а оваа година се врати со освежен репертоар. Првиот концерт од овој проект закажан за 03.02 беше распродаден за помалку од 3 часа. Поради големата заинтересираност на публиката, беше закажан и втор концерт, кој исто така беше распродаден за само 3 часа. Со тоа, Камерниот оркестар на Битола продолжи да руши рекорди. Овој значаен момент не само што ја одразува нивната посветеност кон уметноста и културата, туку и ја потврдува нивната важна улога на македонската музичка сцена.
Имено, изминатата година НУ Камерен Оркестар на Битола оствари повеќе од 30 проекти, меѓу кои и MTV The Greatest Hits Volume 1, во Битола и Скопје, кој беше распродаден за само неколку часа, традиционалниот новогодишен концерт Виена во Битола за кој поради големата заинтересираност во последен момент беа организирани два концерти, Јонче Христовски Симфонија – во Скопје и Битола, кој исто така беше распродаден за само неколку часа, Viva Verdi, Rock & Beat Symphony и многу други. Кажано во бројки, изминатата година околу 20.000 луѓе ги посетија настаните на НУ Камерен оркестар на Битола.
Од НУ Камерен оркестар на Битола упатуваат благодарност до сите кои ги поддржуваат и им даваат мотивација да создаваат поинтересни и повосхитувачки проекти. Како што изјавија од Оркестарот, без поддршката на публиката, тие не би биле тоа што се сега.
За повеќе информации, следете ги профилите на Камерен Оркестар на Битола ⋮IWConnect на социјалните мрежи Facebook и Instagram, или посетете ја нивната веб страна www.chamberorchestrabitola.com.
Фото: Ивона Кочов / Femina.mk
