Славчо Попоски, метеоролог: „Од утре до петок се очекува невреме на повеќе места низ Македонија“

Детали

вторник, 07 мај 2024

„Во Скопје и околината од утре попладне до петок ќе има појава на повремен пороен дожд и грмежи“, вели метеорологот Славчо Попоски.

Првомајските и велигденските празници ги поминавме со променливо, но генерално сончево време.

Но, по денешниот сончев ден, веќе од утре можеме да очекуваме невреме на некои места низ Македонија.

Во продолжение, прогнозата на метеорологот Славчо Попоски:

„Од утре попладне до петок, нашата територија ќе биде под влијание на циклонска активност со центар над Медитеранот.

Токму ова ќе услови поголемо дестабилизирање на атмосферата, па така на повеќе места низ Македонија во попладневните часови ќе има развој на нестабилна облачност, проследена со пороен дожд, грмежи и засилен ветер.

Оваа циклонска активност ќе предизвика локално процесите да бидат поинтензивни и во форма на невреме, проследено со интензивен пороен дожд, силен ветер, силни и чести електрични празнења и со појава на град.

Токму поради очекуваната појава на електрични празнења, препорачуваме крајна внимателност, односно граѓаните да не престојуваат на отворен простор и под осамени дрвја.

За време на оваа циклонска активност локално се очекува да наврне позначително количество на воден талог (над 25l/m²).

И во Скопје и околината од утре попладне, до петок ќе има појава на повремен пороен дожд и грмежи. Во делови од котлината ќе има услови за појава на невреме, проследено со силен ветер и со појава на град.

Температурите во четврток и во петок значително ќе опаднат и ќе се искачуваат во интервалот од 12 до 20 степени.

Пониски температури ќе имаме и за време на викендот, но нестабилноста ќе се намали, а утрата ќе бидат значително посвежи“.

Спирова С. | Црнобело

фото: Фејсбук, freepik.com