УНИЦЕФ: Од почетокот на војната во Газа убиени се речиси 14.000 деца
Повеќе од 13.800 деца се убиени во Појасот Газа од почетокот на војната на 7 октомври, според извршната директорка на Детскиот фонд на Обединетите нации (УНИЦЕФ), Кетрин Расел, објавува Си-ен-ен.
„Илјадници се повредени, а уште илјадници се на работ на глад“, рече таа за време на прес-конференција во Њујорк, според соопштението на нејзината организација.
Во посебна изјава, Ентитетот на Обединетите нации за родова еднаквост и зајакнување на жените рече дека „по едно дете се повредува или умира на секои 10 минути“ во Газа. Во соопштението се додава дека повеќе од 10.000 жени се убиени во Газа од почетокот на војната, а 6.000 од нив оставиле 19.000 деца без родители.
Специјалистот за комуникација на УНИЦЕФ, Тес Инграм, која неодамна ја посети Газа, за време на прес-конференцијата во Женева во вторникот рече дека она што ја погодило е бројот на ранети деца што ги видела.
„Не само во болниците, туку и на улиците, во нивните импровизирани засолништа, продолжувајќи го својот сега трајно изменет живот“, рече таа.