Повеќе од третина од дрвјата ширум светот се на раб на изумирање

Колку би требало да нѐ загрижи состојбата на дрвјата покажуваат следните податоци: бројот на загрозени видови дрвја е повеќе од двапати поголем од сите загрозени цицачи, птици, влекачи и водоземци – заедно.

Меѓу три видови дрвја во светот, има повеќе од еден што е на работ на изумирање - или опстанок, во зависност од перспективата. Ова го покажуваат податоците обелоденети на неодамна одржаниот Самит за биодиверзитет во градот Кали во Колумбија.

Имено, според новата Црвена листа подготвена од Меѓународната унија за зачувување на природата (IUCN), заканата од исчезнување дошла до дури 38% од видовите дрвја од вкупно 192 земји. Покрај растителниот свет, на Црвената листа се наоѓаат и цицачи, птици, инсекти, риби...

За прв пат, поголем дел дрвја во светот се вклучени во овој преглед, а најмалку 16.425 од 47.282 анализирани видови се во опасност од исчезнување.

Дрвјата сега всушност сочинуваат повеќе од една четвртина од видовите на Црвената листа на IUCN, што претставува еден вид глобален попис на статусот на зачувување на над 166.000 видови.

Без разлика на поразителната состојба и меѓу животните, судејќи според податоците, дрвјата се во уште поголем ризик. Според IUCN, бројот на загрозени видови е повеќе од двојно поголем од сите загрозени цицачи, птици, влекачи и водоземци заедно.

„Преку својата витална улога во екосистемите, дрвјата се неопходни за одржување на животот на Земјата“, вели д-р Гретел Агилар, генерален директор на IUCN. „Со оглед на тоа што Црвената листа на IUCN слави шеесет години влијание, оваа проценка ја нагласува нејзината важност како барометар на животот и, што е најважно, како единствена алатка за насочување на акцијата за да се дојде до пресврт во однос на пропаѓањето на природата“.

Во најлоша состојба се дрвјата на островите. Овие видови се изложени на ризик поради низа фактори: од уништување на шумите заради урбанизација преку земјоделството па до инвазивните видови, болести и штетници.

Климатските промени се исто така растечка закана за дрвјата, особено во тропските предели, поради зголемувањето на нивото на морето и посилните, зачестени бури.

И бидејќи сè во природата е меѓусебно испреплетено, губењето на дрвјата би се заканило и на илјадници други видови растенија, габи и животни, предупредува IUCN. Дрвјата играат важни улоги во различни процеси како што се складирање на јаглерод, кружење на водата и хранливи материи, формирање на почвата и регулирање на климата.

Освен тоа, и ние самите зависиме од дрвјата: над пет илјади видови дрвја на Црвената листа на IUCN се користат во градежништвото, а над две илјади за производство на лекови, храна и гориво.

Иако е алармантен, бројот на загрозени видови дрвја треба да нè поттикне на акција: справувањето со заканите со кои се соочуваат дрвјата, заштитата и обновувањето на живеалиштата, но и зачувувањето преку банките со семиња и со помош на ботаничките градини, се од клучно значење за спречување на изумирањето на дрвјата ширум светот, стои во соопштението на IUCN.

Слика: Pixabay

Извор: https://iucn.org