Откако Апасиев го одби, а Димитриевски му постави црвени линии: Мицкоски повторно повика на обединување
„СДСМ прави заговор, Пендаровски моли странци, а опозицијата мора да се обедини“. Христијан Мицкоски и вечерва од митинг порача дека е потребно национално обединување. Тој откако вчера обзнани мораториум и порача да прекинат сите напади кон Левица и ЗНАМ, денеска лидерот на Левица, Апасиев порача дека жестокоста во критиката не смее да попушти и рече: „Не верувај им на ДПМНЕјците, дури и кога ти носат подароци. Термометарот на жестокоста во критиката не смее да се спушти ниту за степен!“
Вечерва Мицкоски повторно порача дека опозицијата мора да се обедини и дека Македонија веќе не може да чека, бидејќи граѓаните се уморни.
„Живееме во тешки времиња. Државата е во хаос, институциите се парализирани, апатија и разочараност се чувствува насекаде. Изгубена е довербата во политичарите, бидејќи народната волја е многупати изигрувана. Ништо не функционира. Македонија е одземена од рацете награѓаните, а граѓаните со право се скептични дали може да се промени тоа“, додаде тој.
Мицкоски оцени дека овие избори се последна шанса за спас, промените, рече, се можни и се на дофат, а народот бара промени затоа што Македонија е изморена од чекање.
Претходно, претседателскиот кандидат Максим Димитриевски од Движењето ЗНАМ – За наша Македонија, повтори дека нема коалицирање со СДСМ, а на лидерот на ВМРО-ДОМНЕ му порача дека без дефинирани црвени линии за Македонија нема ниту разговор за идна коалиција, но нема и без расчистување на коруптивните „опашки“.