Украина го ревидира својот биланс на руски бродови за кои рече дека биле оштетени во нападите за време на викендот.

Се наведува дека биле погодени четири руски бродови, иако во претходните изјави се споменуваа само два.

Украина ја гаѓаше руската Црноморска флота, за која Велика Британија вели дека сега е „функционално неактивна“, пренесува „businessinsider“.

Украинската морнарица во неделата соопшти дека во саботата погодила два од големите руски десантни бродови, „Јамал“ и „Азов“, на окупираниот Крим.

Но, во ажурирањето на податоците неделава, таа рече дека оштетила и два други брода, „шпионскиот брод „Иван Курс“ и големиот десантен брод „Константин Олшански“.

Украинското Министерство за одбрана соопшти дека во нападот на бродот „Константин Олшански“ била употребена противбродска ракета Нептун.

Украина употреби ракета Нептун за да го нападне сопствениот воен брод што Русија го украде пред една деценија при анексијата на украинскиот полуостров Крим.

Велика Британија минатиот месец соопшти дека 25 отсто од руските бродови во Црното Море биле потопени, оштетени или уништени и покрај тоа што Украина нема сопствена функционална морнарица.

„Постојаната илегална окупација на Украина од страна на Путин бара огромни трошоци за руската Црноморска флота која сега е функционално неактивна“, напиша Грант Шапс, додавајќи: „Русија плови по Црното Море од 1783 година, но сега е принудена да ја ограничи својата флота до пристаништето. Па дури и таму тонат бродовите на Путин!“

Украина користеше проектили, беспилотни летала и напади на командоси за уништување на бродови во Севастопол, главното руско пристаниште на Црното Море на Крим.

Како одговор, Русија премести голем дел од своите поморски сили во побезбедни, подалечни пристаништа.