Работи кои НЕ треба да ги правите ако се будите среде ноќ (за да заспиете полесно)

Не го допирајте телефонот и не гледајте колку е часот. Што да НЕ правите ако често се будите навечер, за полесно да заспиете?

Додека некои луѓе без проблем спијат во текот на целата ноќ, постојат и оние кои се будат скоро секоја вечер. А, кога ќе се разбудат, може да биде особено тешко повторно да заспијат.

Веруваме дека ви е јасно кои се последиците од ова – недостаток од сон, замор, намалена концентрација, па дури и влошено здравје.

Ако честопати се будите среде ноќ, важно е да избегнувате некои активности бидејќи ќе ве расонат и дополнително ќе ви го отежнат заспивањето.

Што НЕ треба да правите кога ќе се разбудите навечер?

Не станувајте

Пробајте да останете во кревет, во истата положба во којашто сте се разбудиле.

Ако станете, најверојатно ќе се расоните.

Доколку останете во истата положба и ги затворите очите, поверојатно е да заспиете набрзо.

Не го проверувајте телефонот

Светлината од телефонот речиси сигурно ќе ве расони, а притоа ќе го стимулира вашиот мозок, па ќе биде практично невозможно да заспиете.

Не го проверувајте часовникот

Сигурно ќе бидете во искушение да проверите колку е часот, но пробајте да се воздржите.

Ако видите дека имате само уште два часа додека да треба да станете, ќе се изложите на непотребен стрес.

Веројатно и самите имате забележано дека кога си легнувате доцна и броите колку часа имате за спиење, тогаш чувствувате анксиозност, па потешко ви е да заспиете.

Штом надвор е темно, ќе знаете дека имате уште време за спиење и фокусирајте се на тоа, а не на часот.

Не се превртувајте во креветот

Обично кога се будите среде ноќ, мускулите ви се релаксирани. Но, ако почнете да се превртувате во креветот, ќе ги раздвижите и мускулите.

Слично како станувањето што го спомнавме на почетокот, најдобро избегнувајте го ова и само затворете ги очите.

Можете да пробате и некоја вежба за дишење, како медитација, која дополнително ќе ве релаксира.

Не станувајте за да одите во тоалет

Секако, не можеме да ги контролираме физиолошките потреби, барем не потполно.

Ако често се будите навечер, избегнувајте да пиете вода и течности пред спиење, и тоа барем еден час.

Секако, ако мора да одите во тоалет, тогаш станете и не се воздржувајте бидејќи со тоа му штетите на мочниот меур.

Што ако сепак не можете да заспиете?

Ако ги следевте правилата, но сепак се чувствувате многу расонето, тогаш најдобро станете од кревет.

Направете си чај – од камилица делува релаксирачки – и пробајте да се опуштите.

Не го чепкајте телефонот, не гледајте телевизија и слично, туку можете да медитирате или да прочитате нешто едноставно.

По некое време, би требало да се почувствувате сонливо.

Доколку станувањето навечер ви станува сериозен проблем, тогаш препорачливо е да се консултирате со лекар.

Спирова  С. | Црнобело