Матурантите и годинава најдоа начин како да препишуваат на полагањето државна матура, и покрај одлуката полагањето да биде во поголеми простории.

Исто како и лани, на Вибер група со речиси 7000 членови се споделуваа решенијата од испитот по мајчин јазик. Ова го објави телевизијата Канал 5, до која пристигнале фотографии од групата на кои, според тајмингот, се гледа дека матурантите уште пред почетокот на испитот го фотографирале тестот, а неколку часа подоцна почнале да се споделуваат и одговорите.

Од Државниот испитен центар потврдија дека тие се споделените прашања, но не можат да потврдат дали тестот е пробиен претходно или по почетокот на полагањето кога ученици го фотографирале и го препратиле во вибер групата. Директорката на центарот Билјана Михајловска најголем дел од одговорноста за протекувањето на тестот ја гледа во самите тестатори.

Државниот испитен центар денеска на стручен колегиум ќе одлучува како оценувачите ќе постапат во однос на испитот по мајчин јазик што се спроведе во саботата откако беше пријавено масовно препишување.

Можно е онаму каде е констатирано дека се препишувало тестовите да бидат поништени.

Матурантите препишуваат, институциите немоќни да спречат

Од ДИЦ додаваат и дека онаму каде што ќе откријат дека тестаторите толерирале препишување и истото биде поткрепено со доказ за тоа ќе ги известат надлежните институции.

Во целиот случај треба да се вклучи и МОН, со кој е договорен состанок. На тој состанок дополнително би се договориле и други мерки насочени и кон останатите инволвирани лица во процесот на полагање државна матура.

Матура ќе се полага во холови и спортски сали

Откако матурантите и лани препишуваа од Вибер група, покрај одлуката за полагање во холовите и спортските сали, од ДИЦ беше спомената и можноста за инсталирање на блокатори за телефонски сигнали во училиштата.

– Некогаш се случува да носат повеќе од 1 телефон, еден телефон да го остават на местото каде што треба а другиот да го задржат кај себе. Работа на тестаторот е да го забележи тоа. Мислам дека тука има многу улога и тоа тестаторот како ја завршил својата работа бидејки мене ми е неверојатно да некој човек е задолжен да надгледува 15 ученици и воопшто да не забележи некој ученик го извадил телефонот, го фотографирал тестот, па добил текст, па го препишал цел текст од телефон, а притоа тоа да не се забележи воопшто – изјави директорката на ДИЦ Билјана Михајловска.

Измените во просториите за полагање на државната матура, доаѓаат откако и лани група средношколци преку Вибер група ги споделуваа тестовите и одговорите на прашањата.

Следниот испит ќе биде на 8ми јуни, а првичните резултати се очекуваат најдоцна до 8 јули.