Јеменските бунтовници Хути го нападнаа американскиот танкер „MV Torm Thor“ во Аденскиот залив, соопшти денеска портпаролот на оваа милитантна група, Јахја Сареа, додека САД и Обединетото Кралство извршија воздушни напади врз Сана, главниот град на Јемен.
Групата го гаѓала танкерот со нафта „со неколку бродски проектили“, рекол Сареа.
Американската централна команда (ЦЕНТКОМ) соопшти дека американскиот воен брод „USS Mason“ вчера соборил противбродска ракета истрелана кон Аденскиот Залив од територијата контролирана од Хутите. ЦЕНТКОМ додава дека ниту „USS Mason“ ниту „MV Torm Thor“ не претрпеле никаква штета, ниту пак има повредени.
Главната ТВ станица Al-Massira под контрола на Хутите, синоќа објави дека американските и британските сили извршиле серија воздушни напади врз главниот град на Јемен, Сана.
Американските и британските сили вчера извршија напади врз повеќе од десет цели во Јемен. Хутите, кои контролираат голем дел од Јемен, почнаа да гаѓаат комерцијални бродови на 19 ноември во знак на протест против израелските напади на Појасот Газа.
Како одговор, САД и Обединетото Кралство почнаа напади врз цели на Хутите во Јемен и ја нарекоа групата терористичка.
