За Силјановска Давкова власта е потпалувач на проблеми
Кандидатката за претседател на државата Гордана Силјановска-Давкова ја обвини власта дека не креира рационални политики и дека е потпалувач на сите проблеми. Таа образложувајќи што значи да се води рационална политика, рече дека прво треба да се постави цел и да се одберат актерите кои ќе стигнат до неа.
„Ние што се занимаваме со науката велиме дека политиката мора да биде рационална. Да креираше оваа власт рационални политики во сите области почнувајќи од образованието, здравството, социјалната заштита, меѓународната политика, ние немаше да се чувствуваме понижени“, рече Силјановска-Давкова.
Според неа, потребно е да за претседател да се избере човек од знаење, за кој рече ќе биде опкружен со тим што знае, умее и сака и кој рационално ќе ја води Македонија.
„Понекогаш не може да се предвидат некои нешта, се случуваат ненадејно. Мора да имате одговор и за таквите ситуации. Оваа власт нема одговор и на таквите ситуации. Се појавува проблем, ама вие имате однапред подготвени решенија затоа што имате алтернативи. Што прави оваа власт? Таа власт применува една трета политика, што и не е политика и се вели обид за гаснење на пожари. Ама тие не се пожарникарите. Тие се токму оние потпалувачите на проблемите. Затоа треба да си заминат“,додаде Силјановска-Давкова.