Илон Маск нема ништо против банкрот на Tesla, но под еден услов
Илон Маск продолжува со своите благо речено изненадувачки изјави
Во Tesla отсекогаш велеле дека не гледаат конкуренција во другите производители на електрични возила, туку дека нивните најсериозни ривали се традиционалните производители на автомобили со мотори со внатрешно согорување. И навистина, ако сакаат да ги остварат своите планови за продажба, сигурно ќе мора да земат парче од колачот токму од оние производители со вековна традиција.
Како потсетување, Илон Маск пред речиси една година изјави дека нивната цел е Tesla да го зголеми производството на 20 милиони единици годишно до 2030 година. Звучи невозможно, особено ако се земе предвид дека моментално најголемиот производител, Toyota, произведува едвај над десет милиони возила.
Некои се прашуваат што би се случило ако се појави производител со подобри електрични возила од Tesla. Наводно, Илон Маск не би имал ништо против тоа, тврди Хиромичи Мизуно, член на управниот одбор на Tesla. Тој за CNBC вели дека Илон Маск рекол дека ќе прифати банкрот на Tesla доколку ривалот лансира подобар електричен автомобил.
„Не се согласувам секогаш кога Илон вели дека не би му пречел банкрот на Tesla ако некој друг излезе со подобар автомобил. Мислам дека тоа е негова филозофија и на Tesla“, вели членот на управниот одбор на Tesla.
Од неговите зборови лесно се чита дека Маск во неколку наврати споменувал банкрот на Tesla. Тешко е да се каже дали Маск мисли дека ова е една од опциите или е толку убеден во супериорноста на Tesla што малку се опушта со ваквите изјави.
Илон Маск, „човек или вонземјанин“?
На прашањето што мисли за се поголемиот притисок врз Илон Маск, Мизуно се шегува дека не е сигурен дали милијардерот е „човек или вонземјанин“. Воедно, тој изразува благодарност за упорноста на извршниот директор на Tesla.
Инаку, Хиромичи Мизуно е поранешен главен инвестициски директор на Јапонскиот државен пензиски инвестициски фонд и во одборот на Tesla е од април 2020 година. По неговото доаѓање, Маск има изјавено дека Tesla била „околу еден месец“ одалечена од банкрот од средината на 2017 година до средината на 2019 година.