„Макпрогрес“ си направи академија за да има слаткари и пекари
Оваа иницијатива е инвестиција во младите луѓе, во иднината на прехранбениот сектор и во општеството како целост, изјави генералниот директор на „Макпроргрес“, Глигор Цветанов.
„Макпрогрес“ ја промовираше „Винчини академијата“, која е основана за да си обезбеди кадар за работа овој прехранбен гигант. Како што информираa од компанијата, претставувањето на Академијата било во понеделникот пред присутни претставници од компании, средни и технички училишта. Преку Академијата ќе се спроведува првата сертифицирана програма за кондитор, слаткар и пекар во Македонија.
– „Винчини академијата“ ја креиравме со цел да ги подготвиме идните генерации на кондитори, да ги обучиме со најнови техники и вештини во секторот и да го поддржиме нивниот кариерен напредок. Оваа иницијатива е инвестиција во младите луѓе, во иднината на прехранбениот сектор и во општеството како целост. Ние целиме да создадеме пат за подобро општество, каде што квалификуваната работна сила е достапна и каде што компаниите во прехранбениот сектор можат да го најдат неопходниот талент за своите потреби – истакна генералниот директор на „Макпроргрес“, Глигор Цветанов.
Програмата е во времетраење од три месеци, а ќе предаваат врвни инструктори од прехранбената индустрија. Предавањата ќе се одржуваат во просториите на „Винчини развоен центар“. Едукативниот центар е опремен со најнова технологија и нуди уникатни услови за преквалификација и доквалификација на вработени и невработени, најави Александра Кирилова, директор на „Прогресив академија“.
Програмата за развој на технички вештини и обуки за менаџмент се реализира во партнерство со Макпрогрес и ЕБРД, а имплементаторот на програмата е консултантската компанија од Скопје „Праим поинт“.
Компанијата „Макпрогрес“ има пет бренда: „Винчини“, „Винчини фајнест“, „Армонија“, „Сончева долина“ и „Натура“.