Во изјавата потпишана од клучните членови на тимот на OpenAI - Грег Брокман, Илја Сукевер, Џон Шулман, Сем Алтман, Војачек Заремба и целиот тим на OpenAI - се претставени детали кои фрлаат светлина на динамиката помеѓу Маск и компанијата, како и обвинувања против познатиот претприемач.
Според OpenAI, придонесот на Илон Маск во развојот на компанијата бил значително помал од првично очекуваното. Од своето основање во 2015 година, Маск обезбедил помалку од 45 милиони долари на компанијата, и покрај првичното ветување за финансирање до 1 милијарда долари.
Размената на вакви ставови дојде откако Маск ги тужеше Алтман, Брокман и OpenAI, тврдејќи дека компанијата отстапува од својата основачка мисија за развој на вештачка интелигенција во корист на човештвото, обвинувајќи ги дека ги префрлаат своите приоритети на профит, пред сѐ во корист на Мајкрософт.
Во своето соопштение, OpenAI нагласи дека, согледувајќи ја потребата од огромни компјутерски ресурси за развој на вештачка општа интелигенција (AGI), заклучиле дека е неопходно да се премине во профитабилна структура за да се обезбеди потребното финансирање. Тука се покажало несогласувањето со Маск, кој во тој момент изразил желба да го спои OpenAI со Tesla или да преземе целосна контрола над компанијата.
„Додека разговаравме за структурата на профит за да ја унапредиме мисијата, Илон сакаше да се споиме со Tesla или сакаше целосна контрола. Илон го напушти OpenAI, велејќи дека мора да има релевантен конкурент на Google/DeepMind и дека тој ќе го стори тоа, а би нѐ поддржал да си го најдеме патот“, напиша компанијата OpenAI.
На обвинувањата на Маск дека OpenAI ги напуштила своите принципи со отворен код, компанијата одговори со нагласување дека Маск бил свесен и се согласил на постепено поместување од целосната транспарентност додека компанијата напредува со развојот на AGI.