Македонските програмерки ги разбиваат стереотипите зад компјутерите
Застапеноста на девојките студенти на ИТ студиите е на високо ниво, споредбено со поголем број ЕУ држави, при што над 50 отсто од студентите кои студираат природни науки, математика и информатика, како и инженерство, производство и градежништво се жени. Сепак, најголем број студентки на ИТ студиите на УКИМ, можете да сретнете на ФИНКИ, каде сочинуваат вкупно 39 отсто од сите студенти на факултетот, посочи Антони Пешев, извршен директор на СКСМ, кој и самиот доаѓа од ИКТ бизнисот, честитајќи го интернационалниот ден на Девојките во ИКТ.
-Како Комора со низа активности работиме за да ги разбиеме стереотипите дека не постои машка и женска професија, туку се зависи од интересите и можностите на личноста. ИКТ е една од најбрзо растечките индустрии, но и најпросперитетна професија на денешницата. За ова зборува и фактот дека се повеќе луѓе се решаваат за квалификација, но и преквалификација во професии во оваа сфера, што во значајна мера е присутно и во нашата земја. Светот на технологијата се менува многу брзо и во наредните пет години Македонија ќе мора да се адаптира за да не заостанува, бидејќи се повеќе ќе се применува вештачката интелегенција – предупреди Пешев.