Северна Кореја ги спроведе своите први вежби за нуклеарни контранапади, симулирајќи го системот за управување со „копче за нуклеарно лансирање“ под водство на лидерот Ким Џонг Ун.

Државната корејска новинска агенција „KCNA“ го објави почетокот на овие вежби.

Ким Јонг Ун ги набљудуваше симулираните вежби, кои вклучуваа воени маневри за позиционирање за нуклеарни контранапади и артилериско гаѓање со симулирани нуклеарни боеви глави како одговор на алармот за нуклеарна криза.

Изразувајќи задоволство од обуката, Ким високо ја пофали подготвеноста на „најдоброто“ тактичко нуклеарно оружје во светот, како што објави државната новинска агенција.

Меѓувреме, јужнокорејската војска објави дека Северна Кореја лансирала повеќе балистички ракети со краток дострел во Источното Море на почетокот од неделава.

Началникот на Здружениот Генералштаб потврди лансирање на неколку балистички ракети со краток дострел од регионот Пјонгјанг во 15 часот и 10 минути.

„Севернокорејските ракети летаа приближно 300 километри пред да слетаат во морето“, се вели во соопштението до медиумите, без притоа да бидат дадени дополнителни детали поради тековните анализи.

Здружениот Генералштаб го осуди лансирањето на проектили како „јасна провокација“, нагласувајќи ја заканата што тие ја претставуваат за мирот и стабилноста на Корејскиот полуостров и вети дека ќе одржи зголемена будност против какви било понатамошни провокации.

Ова е прво лансирање на балистичка ракета на Северна Кореја по тестирањето на нова балистичка ракета со среден дострел опремена со хиперсонична боева глава.

Претходно, Северна Кореја објави дека извршила „тест за моќ на супер-голема боева глава“ за стратешка крстосувачка ракета и тестирала нова противвоздушна ракета во Жолтото Море во петокот минатата недела.