Шел продава малопродажна мрежа во Европа
Британско-холандскиот нафтен гигант Шел објави дека се повлекува од малопродажбата на енергија во Велика Британија, Германија и Холандија поради слабата заработка, очекувајќи договор со потенцијалните купувачи во наредните месеци.
Не долго откако го презеде кормилото во Шел, извршниот директор Ваел Саван започна стратешка анализа, наведувајќи ги „тешките пазарни услови“ како причина, потсетува Ројтерс.
„Анализата е завршена, а резултатот е нашиот план за повлекување од тие бизниси. Процесот на продажба е веќе во тек, со намера во наредните месеци да се постигне договор со потенцијален купувач“, соопштуваат од „Шел“.
Големопродажниот бизнис со продажба на енергија на компании и снабдувањето со мали и средни компании под брендот Шел енерџи, како и малопродажбата на енергетски производи за домаќинствата на локации надвор од Европа нема да бидат дел од потенцијалната продажба. Ројтерс минатиот месец објави дека три од најголемите британски снабдувачи со електрична енергија покажале интерес да го преземат малопродажниот бизнис на Шел во Велика Британија.