Владата на Црна Гора планира да поднесе два амандмани на Резолуцијата за Сребреница за да се постигнат најдобри можни односи и да се смири политичката тензија во регионот, потврдија неофицијално од тамошната Влада за „Вести“.

Во првиот амандман се вели дека „ вината за кривичното дело геноцид е индивидуализирана и не може да се припише на ниту една етничка, верска или друга група или заедница како целина“, а вториот дека „се потврдува неповредливост на општиот рамковен договор за мир во Босна и Херцеговина во сите нејзини одредби“.

Неколку министри со кои контактираше ТВ Вести велат дека не се запознаени за постоењето на ваков предлог, а со тоа и за неговата содржина.

Со усогласениот текст на Резолуцијата за Сребреница го прогласува 11 јули за Меѓународен ден на сеќавање и комеморација на геноцидот во Сребреница во 1995 година, кој ќе се одбележува секоја година.

„Безрезервно го осудуваме секое негирање на геноцидот во Сребреница како историски настан и ги повикуваме земјите-членки да ги зачуваат утврдените факти, вклучително и образовниот систем, преку развивање соодветни програми, како знак на сеќавање, за да се спречи негирање и искривување на појава на геноцид во иднина“, се наведува во текстот на резолуцијата за која ќе се изјасни Генералното собрание на ОН.

Резолуцијата дополнително „ги осудува дејствијата што ги величат осудените за воени злосторства, злосторствата против човештвото и геноцидот од страна на меѓународните судови, вклучително и оние кои се одговорни за геноцидот во Сребреница“.

Се нагласува и важноста од завршување на процесот на пронаоѓање и идентификација на преостанатите жртви на геноцидот во Сребреница, за да имаат достоинствен погреб, и се повикува на продолжување на гонењето на оние извршители на геноцидот во Сребреница кои се уште не се соочени со правдата.

Резолуцијата ги повикува сите држави целосно да ги почитуваат своите обврски од Конвенцијата за спречување и казнување на криминалот на геноцид и меѓународното обичајно право за спречување и казнување на геноцид, со должно почитување на релевантните одлуки на Меѓународниот суд на правдата.

Се бара од генералниот секретар на ОН да воспостави програм за информирање со наслов „Геноцид во Сребреница и Обединетите нации“, почнувајќи од неговите подготвителни активности за 30-годишнината во 2025 година, како и да го скрене вниманието на сите земји-членки, организации на системот на ОН и на граѓанските организации да ја почитуваат оваа Резолуција.

„Сите земји-членки, организации на системот на ОН, други меѓународни и регионални организации и граѓанското општество, вклучително и невладини организации, академски институции и други релевантни чинители се поканети да го одбележат Меѓународниот ден, вклучувајќи специјални церемонии и активности во спомен на жртвите на геноцидот во Сребреница во 1995 година, како и соодветни активности за едукација и подигање на јавната свест“, се наведува во предложените заклучоци од Резолуцијата.