Шпанија ќе формира фонд кој ќе биде финансиран претежно од Католичката црква за да им плати отштета на околу 440.000 жртви на повеќедецениската сексуална злоупотреба извршена од католички свештеници, блиски до нив и наставници, најави министерот за правда.
Ваква оценка даде извештајот на шпанскиот омбудсман во октомври по анкета на 8.000 луѓе.
Тогаш беше препорачано формирање на државен фонд, а Црквата беше обвинета дека не соработувала и се обидувала „да ја минимизира оваа појава колку што е можно повеќе“.
Министерот за правда Феликс Боланос им рече на новинарите дека Црквата, која беше исклучително влијателна во шпанското општество и политика до и по крајот на десничарската диктатура во 70-тите, со децении не ги исполнила барањата за компензација и дека нејзините реакции на извештајот варираше во зависност од епархијата.
„Сакаме да дејствуваме за да спречиме, поправиме и да се обидеме да го вратиме долгот што нашето општество го должи на жртвите“, рече Боланос.
Владиниот план, кој треба да се спроведе до 2027 година, предвидува сè уште недефинирана формула со која од Црквата ќе се бара „да го плати целиот надомест или нејзиниот поголем дел, како и гаранција за другите елементи на симболичната компензација“.
Боланос рече дека неговото министерство ќе преговара со епископите за придонесот што црквата е подготвена да го плати во фондот и дека има впечаток дека свештенството е подготвено за соработка.
Но, во исто време, шпанската бискупска конференција објави дека не може да прифати план со кој се исклучуваат жртвите на сексуална злоупотреба во други организации, бидејќи тој „претставува осуда на целата Црква, а покрива само дел од проблемот“.
Во ноември Црквата за прв пат соопшти дека има намера да ги обештети жртвите дури и во случаи кои не се целосно решени бидејќи свештеникот што го извршил злосторството оттогаш починал.
Боланос рече дека независното експертско тело ќе ги проучува случаите во кои насилникот умрел, оние за кои истекол рокот на застареност или оние кои никогаш не стигнале до судот.
