Граѓанските организации со прашања до идните парламентарци: Како ќе се справите со загадувањето, урбанизмот, владеење на право, квалитет на живот?
Неколку граѓански и независни иницијативи доставија 18 прашања до политичките партии кои учествуваат на парламентарните избори поврзани со загадувањето, урбанизмот, владеење на право, квалитет на живот и побараа од идните парламентарци до 2 мај да добијат одговор за политиките што ќе се носат во наредните четири години.
„Ние од граѓанските иницијативи, независните иницијативи кои учествуваа на локалните избори и еко-здруженијата со досегашното делување стекнавме искуство, но и големо знаење за состојбите и потребите за промени. Неброено пати ги повикувавме институциите за да бидеме заедно на страната на промените, за да се подобрува, унапредува и да се обезбеди квалитетен живот на сите граѓани. Затоа денес до политичките партии учесници на изборите доставуваме 18 прашања на кои наместо флоскули и демагогија очекуваме конкретни одговори со рокови, буџет и одговорни институции и личности. Само така ќе бидеме убедени дека се знае како да се променат работите, а не само да се ветува без план“, се вели во сооптението.
Тие велат дека речиси 70 проценти од законите се спроведуваат на локално ниво, а одлуките кои следните парламентарци ќе ги носат, директно ќе влијаат и на политиката на локално ниво.
„Ние на овие избори не учествуваме директно, но и ние и останатите граѓани гласаме. И сакаме информирано да гласаме! Одговорите од партиите ги очекуваме до 2 мај“, порачаа од граѓанските иницијативи.
Како граѓани, имаме право на одговори за клучните прашања поврзани со:
Загадувањето
Урбанизмот,
Владеењето на правото
Квалитетот на животот
Нашите заложби се јасни: транспарентно, чесно, законито и правично општество за сите, политики кои ги штитат граѓанинот и јавниот интерес, обезбедуваат и стимулираат активно граѓанско вклучување и обезбедуваат здрава животна средина и подеднакви квалитетни услуги за сите граѓани низ државата.Во исчекување сме да ги чуеме конкретните одговори од учесниците на изборите. Од нивниот одговор зависи и нашиот одговор на гласањето.
Прашањата се потпишани од:
Граѓанска иницијатива Шанса за Центар – Скопје
O2 Иницијатива
Граѓанска иницијатива Зелен хуман град – Скопје
Граѓанска иницијатива Зелените од Гази Баба – Скопје
Граѓанска иницијатива Независни за Карпош – За заштита на Карпош- Скопје
Граѓанска иницијатива Заедно за промена – Скопје
Граѓанска иницијатива Стига е – Струмица, Босилово, Ново Село
Граѓанска иницијатива За Расадник на можности, за хуман живот во Кисела Вода – Скопје
Граѓанската иницијатива Грин.Орг – Кочани
Граѓанската иницијатива Охрид SOS – Охрид
