Од песните на реге легендата Боб Марли и австралиската поп-ѕвезда Кајли Миног, кралот Чарлс откри дел од музиката што му донесе радост низ годините и го формираше саундтракот на неговиот живот.
На плејлистата има 17 песни избрани од британскиот монарх насловена „Музичката соба на кралот“ (The King’s Music Room), а ќе се емитува на 10 и на 11 март на глобалните радио станици на „Епл мјузик“ како прослава на Денот на Комонвелтот.
„Во текот на мојот живот, музиката ми значеше многу“, вели Чарлс во трејлерот, снимен во Бакингемската палата.
„Таа ја има таа извонредна способност да враќа среќни спомени и да нѐ утеши во време на тага и да нѐ однесе на далечни места“, рече кралот Чарлс.
Покрај споделувањето на неговата плејлиста, Чарлс (76), пренесува и анегдоти за неговите средби со некои од музичарите и зошто песните му биле важни.
Од „Епл“ рекоа дека разновидната плејлиста вклучува музика од 1930-тите, како и понова музика од Марли и Миног.
Кралот Чарлс рече дека идејата изгледа како интересен и иновативен начин да се одбележи Денот на Комонвелтот, годишната прослава на доброволното здружение на 56 нации што еволуирале од британската империја, чиј лидер е тој сега.
„Ова е она што особено сакав да го споделам со вас, се песните кои ми донесоа радост“, вели кралот.
Фото: „Епл мјузик“
