Стрелец на единствениот гол во победата на Борусија од Дортмунд против Пари Сен-Жермен беше Никлас Филкруг, а овој германски напаѓач зад себе има навистина интересно фудбалско патување.
Иако веќе има 32 години, дури сега излезе на големата сцена и го игра најдобриот фудбал во кариерата. До 30-годишна возраст главно беше второлигашки играч, а потоа неговите одлични настапи во Вердер му донесоа повик во германската репрезентација, каде сега е прв напаѓач.
Никлас Филкруг ја искористи одличната асистенција од Нико Шлотербек и му донесе минимално водство на Борусија во полуфиналето од Лигата на шампионите синоќа против ПСЖ. По реваншот, тој гол може да биде најважниот сезонава за популарните „Милионери“ и сензационално да ги однесе во финалето на Лигата на шампионите, на што оваа сезона не се надеваа ниту најоптимистите меѓу навивачите на клубот.
Но, патот на Филкруг беше навистина тежок. Кариерата ја започна во Вердер од Бремен, а по одличната сезона во 2.Бундеслига го сврте вниманието на бројни европски екипи кон себе. Во Вердер остана уште една сезона, а потоа се пресели во Борусија каде исто така одлично му оди сезонава.
Како второлигаш почна да добива повици во германската сениорска репрезентација каде на 15 натпревари постигна блескави 11 гола и со тоа го зацврсти своето место на претстојното Европско првенство.
Додека се бореше за пласман во повисок ранг, Филкруг се соочи со бројни тешкотии. Има една интересна приказна од еден тренинг на Вердер.
Имено, Филкруг завршил во болница по несреќа на тренинг, а причината е судир со соиграч при што забот на соиграчот му се заглавил во челото.
Случајниот директен судир бил толку сериозен што и двајцата морале да одат во болница, а лекарите морале да отстранат заб од челото на Филкруг.
„Беше многу опасно за мене поради заканата од инфекција предизвикана од бактерии“, се сеќава Филкруг за инцидентот на официјалната веб-страница на Бундеслигата.
Интересен е и прекарот што го носи Филкруг. Имено, тој е познат како Lucke, што на германски значи „празнина“, а тоа го добил поради изгледот на предните заби.
Покрај за Вердер и Борусија, Филкруг има играно и за Гројтер Фирт, Нирнберг и Ханофер 96. Во Бундеслигата има одиграно 156 натпревари и постигнато 56 голови, а ја игра седмата сезона во кариерата.
