Нов портрет на принцот Луи за 6-иот роденден – Кејт ја прескокна традицијата за најмалиот син

Детали

вторник, 23 април 2024

Секоја година на родендените на децата Кејт Мидлтон точно на полноќ објавуваше нивни портрети, но годинава тоа не се случи. Фановите на кралското семејство беа разочарани затоа што портретот на најмалиот принц Луи (6) го добија со задоцнување.

Обожавателите на британското кралско семејство се навикнати принцезата од Велс, Кејт Мидлтон, секоја година по повод родендените на нејзините деца, точно на полноќ да објавува нивни фотографии со кои ги одбележува важните денови.

Таа велеше дека е традиција вечерта пред нивните родендени таа да остане будна до полноќ и да подготвува домашна торта за следниот ден.

„Стана веќе традиција јас да останам будна до полноќ со огромни количини состојки за торти и филови и често правам повеќе од што треба, но ги обожавам тие мигови“ – рече во една пригода принцезата.

Затоа многумина останаа разочарани кога во очекуваното време денес (23.04) не се појави фотка од најмалиот принц Луи, кој го слави својот 6-ти роденден.

Иако традицијата во минатото била роденденската фотографија да биде испратена до поголем број од редакциите ден претходно, со забрана за објавување, како што пишува Daily Mail годинава тоа не се случило.

Голем број од светските медиуми утрово објавија дека Кејт ја прекинала традицијата и дека од принцот Луи нема да биде објавена фотка за неговиот 6. роденден.

Но, околу 13 часот, на официјалниот Инстаграм профил на принцот и принцезата од Велс беше објавен портрет на најмалиот принц кој позира со насмевка и лежи бос на ќебенце на трева.

„Среќен 6-ти роденден принц Луи! Ви благодариме за убавите пораки денес“ – стои во описот до објавата.

Фотката повторно е дело на принцезата Кејт Мидлтон која по повод Денот на мајките беше обвинета дека премногу ја фотошопирала фотографијата на која таа е заедно со трите деца.

За потсетување, Кејт во јавност се немаше појавено речиси два месеца, за потоа по големиот број шпекулации да излезе и јавно да соопшти дека во моментов се бори со рак.

Таа не соопшти јавно за каков тип на канцер станува збор, но нејзината видео порака беше „шлаканица“ за сите оние што подолг период коваа теории на заговор и се потсмеваа на сметка на идната британска кралица.

Прочитајте и Смешни теории на заговор на Твитер: „Дијана е мртва, Чарлс има рак, Кејт исчезна – се знае кој е виновен“

Б. С. Б. | Црнобело