Израел со понуда до Хамас: Шест недели прекин на огнот во замена за 40 заложници
Израелски претставници на чело со шефот на Мосад, Давид Барнеа, со нов предлог до Хамас денеска се упатија во Катар.
На маса ставена понуда која предвидува шест недели прекин на огнот во замена за 40 заложници.
Израелските власти проценуваат дека овие преговори, чии посредници ќе бидат Катар и Египет, би можеле да траат и до две недели, пренесува Ројтерс.
Хамас пак, кој повика на преговори, нуди ослободување на 35 заложници во замена за шестнеделен прекин и ослободување 350 затвореници кои во моментов се по израелските затвори, пренесува Тајмс оф Израел.
Покрај тоа, Хамас би ослободил пет жени припаднички на израелските вооружени сили во замена за 50 затвореници, а израелските сили би се повлекле од двата главни патишта во Газа за раселените Палестинци да се вратат на северот на Газа и за хуманитарната помош непречено да стигнува во таа област, што би била прва фаза од договорот.
Во втората фаза двете страни би прогласиле траен прекин на огнот, а Хамас би ги ослободил преостанатите заложници во замена за уште затвореници, додека во третата фаза Хамас би ги предал сите тела на починатите кои ги има во замена за деблокада на Газа.
Израел ја исклучи опцијата за траен прекин на огнот, останувајќи така на планот целосно да го уништи Хамас по размената на заложниците.