Новинарката која го сними последното видео на рускиот опозициски политичар Алексеј Навални пред да почине, Антонина Фаворскаја, е приведена од властите.

Фаворскаја ги покриваше судењата на Навални со години, а организацијата за слобода на медиумите Репортери без граници во четвртокот објави дека таа е една од шесте новинари ширум земјата што биле приведени овој месец, пренесува Гардијан.

Руските власти ја приведоа Фаворскаја доцна во средата и ја обвинија за учество во „екстремистичка организација“ со објавување на социјалните мрежи на Фондацијата за борба против корупцијата на Навални, соопшти руската група за човекови права ОВД-Инфо.

Портпаролката на Навални, Кира Јармиш, рече дека Фаворскаја не објавила ништо на платформите на фондацијата и предложила руските власти да ја нападнат затоа што ја извршувала својата работа како новинарка. ОВД-Инфо соопшти дека Фаворскаја првично била приведена на 17 март откако положила цвеќе на гробот на Навални.

Таа помина 10 дена во затвор откако беше обвинета за непослушност кон полицијата, но кога тој период на притвор заврши, властите повторно ја обвинија и и наредија да се појави во петок во московскиот окружен суд Басмани, соопшти ОВД-Инфо.

Таа е една од неколкуте руски новинари кои беа цел на властите како дел од сеопфатната акција против неистомислениците во Русија.

Две други новинарки, Александра Астахова и Анастасија Мусатова, исто така беа привремено приведени откако дојдоа да се сретнат со Фаворскаја во притворниот центар каде што таа беше задржана, соопшти Репортери без граници.

Екатерина Аникевич, од руската информативна страница СОТАвишон, и Константин Јаров од РусЊуз, беа исто така приведени од полицијата додека известуваа за претресот на домот на Фаворскаја.

Јаров за Русњуз изјави дека бил претепан додека бил во притвор: „Ме клоцаа, ми ставија нога на глава, ми ги вртеа прстите, ме исмејуваа кога се обидов да станам, бараа да го покажам мојот ранец како да има експлозив“.

Во Уфа, 1.300 километри источно од Москва, руските власти во средата ја приведоа Олга Комлева, новинарка на Русњуз. Тие, исто така, ја обвинија за екстремизам и вмешаност со Навални и неговата организација, според Репортери без граници.

Фондацијата за борба против корупцијата на Навални е прогласена за екстремистичка организација од руските власти, што значи дека луѓето поврзани со неа може да се соочат со затворски казни.