Дачиќ: Разговорите за новата српска влада сѐ уште не се почнати, подготвени сме за соработка со СНС
Лидерот на Социјалистичката партија на Србија (СПС), Ивица Дачиќ изјави дека партијата е подготвена да ја продолжи соработката со Српската напредна партија (СНС) на преседателот Александар Вучиќ, како и дека разговорите за новата влада на Србија сѐ уште не се започнати, јави дописникот на МИА од Белград.
Дачиќ за денешна „Политика“ изјави дека СПС е подготвена да ја продолжат соработката со СНС и дека единственото прашање му е како најдобро може да помогне, бидејќи, како што наведе, СНС освоила најголем број гласови на неодамна одржаните парламентарни избори.
Исто така, тој рече дека тоа не е ништо ново и дека (СПС и СНС) имале многу добра соработка во изминатите десет години.
„Тие резултати беа многу добри и логично е, согласно нашите заеднички цели, да ја продолжиме соработката кога е во прашање парламентот и новата влада на Србија“, рече Дачиќ.
Тој, исто така, кажа дека тие разговори сѐ уште не се започнати и додаде дека „не е виновен претседателот (на Србија и на СНС Александар) Вучиќ зошто досега не е конституиран новиот српски парламент, бидејќи изборите во Велики Трновац се повторуваат петпати“.
По претседатеските, парламентарните и изборите за град Белград во април годинава, досега парламентот во Србија сѐ уште не е конституиран поради повторување на изборите во Велики Трновац, а СПС и СНС формираа коалициона соработка за градот Белград, врз база на која беше избран Александар Шапиќ (СНС) за нов градоначалник на главниот град на Србија.
Извор: МИА