• Зоран Мишевски
По четири последователни порази минатата недела, Лос Анџелес Лејкерс вечерва се врати на победничките патеки. Лејкерси пред своите гледачи го совладаа Феникс Санс со 107-96 и сега се на петтото место во Западната конференција со скор 41-25, додека Феникс е подалеку од плеј-офот и со биланс 31-37 го зазема единаесеттото конференциско место.
Лејкерси повторно играа без Леброн Џејмс, кој поради повреда не игра од дуелот со Бостон Селтикс пред седум дена, но Лука Дончиќ заздрави и откако го пропушти натпреварот против Денвер Нагетс, со голем стил се врати на теренот. Веќе во првата четвртина Словенецот и соиграчите јасно им ставија до знаење на Санси дека вечерва немаат што да бараат во Лос Анџелес. Домашните го добија тој дел од играта со 31-15 и рутински го одржуваа водството до крајот, предводени од маестралниот Словенец.
Дончиќ постигна 33 поени, заедно со 11 скока и 8 асистенции за околу 40 минути игра, а одличен беше и Ривс со 28 поени и шест асистенции. Кај гостите Кевин Дурент запиша 21 поен и 9 скока, а Букер крај своето име имаше 19 поени и 11 асистенции.
