Американскиот претседател Џо Бајден на шега им порачал на своите колеги дека клучот за долг и среќен брак е добриот секс, за што, меѓу другото, се зборува и во новата книга за американските први дами, пишува „Ројтерс“.

„Американска жена: трансформацијата на модерната прва дама – од Хилари Клинтон до Џил Бајден“ е книга на дописничката на „Њујорк тајмс“ од Белата куќа, Кејти Роџерс. Во делото, кое беше објавено неделава, сегментот за сексуалниот живот на Бајден сочинува само неколку параграфи, но веќе ги поттикна медиумите да пишуваат интересни наслови.

Роџерс пишува дека Бајден одлучил да не се кандидира за претседател во 2004 година, а одлуката им ја соопштил на соработниците откако Џил Бајден влегла во собата, облечена во кратка маичка и со пораката „НЕ“ исцртана на нејзиниот стомак.

Бајден, кој денес има 81 година, им кажа на група поддржувачи во тоа време дека не е премногу заинтересиран да се кандидира за претседател.

„Попрво би останал дома и би водел љубов со сопругата додека моите деца спијат“, рече тој.

Неговиот портпарол само го отфрли коментарот на неговиот шеф, откривајќи дека тогашниот сенатор Бајден бил „искрено и целосно вљубен во својата сопруга“, пишува Роџерс во својата книга.

Во книгата се зборува и за страдањата низ кои поминал сегашниот американски претседател кога неговата прва сопруга Неилија и ќерката Наоми загинале во сообраќајна несреќа во 1972 година. Тој се оженил со Џил во 1977 година, но Роџерс пишува дека морал да ја запроси петпати пред таа да се согласи.