Либанското движење Хезболах објави дека денеска цели на две воени позиции во северниот дел на Израел, како одговор на нападите врз „цивилните домови во јужниот дел на Либан“ каде синоќа загинаа три лица, меѓу кои и двајца борци на движењето.

Борците на Хезболах „извршиле комплексен напад, користејќи експлозивни беспилотни летала и наведувани проектили, врз седиштето на воената команда Ал-Манар и врз собирот на силите на 51-от баталјон на бригадата Голани“, се вели во соопштението на либанското исламистичко движење.

Од почетокот на војната меѓу Израел и палестинското движење Хамас во Појасот Газа на 7 октомври, секојдневно има размена на оган меѓу израелската армија и Хезболах, кој тврди дека го поддржува палестинското исламистичко движење.

Проиранскиот Хезболах, кој има арсенал ракети и прецизни ракети, цели на израелски воени позиции и локации во близина на границата, а Израел реагира со бомбардирање цели на либанска територија, претежно на југ, вклучително и целни напади врз претставници на Хезболах и Хамас.

Конфликтите се интензивираа во текот на оваа недела. Израел напаѓаше се подлабоко и подлабоко на либанска територија, а Хезболах одговори со посложени напади на израелските воени позиции на северот на земјата.

Во речиси седум месеци прекугранична војна, најмалку 385 луѓе, вклучувајќи 254 борци на Хезболах и 73 цивили, се убиени во Либан, според АФП.

На израелска страна, според армијата, загинале 20 лица.