Надал по елиминацијата во Мадрид: Сè уште не знам дали ќе играм на „Ролан Гарос“
Шпанија на нејзино тло најверојатно го гледаше последниот меч на нивниот најголем тенисер во историјата, Рафаел Надал, кој го заврши настапот во Мадрид каде во осминафиналето загуби од Јиржи Лехечка од Чешка со 2:0 во сетови 7:5, 6:4.
Сега за Рафа следува учеството на мастерсот во Рим (8-19 мај), па грен слем турнирот „Ролан Гарос“ во Париз, (20 мај – 9 јуни).
– Ќе играм во Рим, со надеж дека ќе бидам подобар од овде. И после тој турнир ќе се одлучам за „Ролан Гарос“. Сè уште не сум сигурен дека ќе настапам во Париз – изјави Надал по поразот од Лехечка.
Иако беше подобар во Мадрид од неколку дена претходно во Барселона, факт е дека денес Надал е далеку од неговите најдобри денови.
– Го напуштам Мадрид со многу подобро чувство отколку кога пристигнав. Тешко е дури и да се замисли дека можеш да постигнеш некој успех со формата во која сум сега, но во спортот работите се менуваат многу брзо. Ќе играм во Рим, тоа е посебен турнир за мене. Го освоив 10 пати. Сакам да играм добро. Верувам дека можам да направам нешто – се зборовите на Надал.