Советот за безбедност на Обединетите нации денес го издаде своето прво барање за запирање на борбите во Газа, повикувајќи на прекин на огнот за време на светиот муслимански месец Рамазан, откако САД се воздржаа. Тоа наиде на итен протест од израелскиот премиер Бенјамин Нетанјаху.
Нетанјаху ја откажа планираната посета на делегација на високо ниво на Вашингтон и ги обвини САД дека се „повлекуваат“ од „принципиелната позиција“ со тоа што дозволиле гласањето да помине без условување на прекинот на огнот со ослободување на заложниците што ги држи Хамас.
Резолуцијата беше усвоена со 14-0 откако САД одлучија да не го користат правото на вето на резолуцијата, која, исто така, бараше ослободување на сите заложници заробени за време на нападот на Хамас на 7 октомври во јужен Израел.
Клучна причина за минатото вето на САД на резолуциите за прекин на огнот на Советот за безбедност беше неуспехот директно да се поврзат со ослободувањето на заложниците.
САД тврдеа дека двете прашања се поврзани додека Русија и Кина се залагаат за безусловни повици за прекин на огнот.
Резолуцијата одобрена денес бара ослободување на заложниците, но не го прави услов за прекин на огнот. Одлуката на САД да се воздржат доаѓа во време на растечки тензии меѓу администрацијата на претседателот Џо Бајден и Нетанјаху, кој ги отфрли напорите на САД да спречи потенцијално разорна израелска копнена инвазија на градот Рафа во јужниот дел на Газа и го отфрли повикот на Бајден за евентуално создавање на палестинска држава.
За време на посетата на САД, израелската делегација требаше да им ги претстави на претставниците на Белата куќа своите планови за Рафа, каде над 1 милион палестински цивили побараа засолниште од војната.
Портпаролот на Белата куќа за национална безбедност Џон Кирби рече дека САД биле „доследни“ во поддршката за прекин на огнот како дел од договорот за заложници.
„Причината поради која се воздржавме е затоа што овој текст на резолуцијата не го осудува Хамас“, рече Кирби.
Гласањето доаѓа откако Русија и Кина ставија вето на резолуцијата спонзорирана од САД во петокот, која би поддржала „непосреден и одржлив прекин на огнот“ во конфликтот меѓу Израел и Хамас.
САД предупредија дека резолуцијата одобрена денес може да им наштети на преговорите за запирање на непријателствата на САД, Египет и Катар, зголемувајќи ја можноста за ново вето, овојпат од Американците.
Бидејќи Рамазан завршува следниот месец, барањето за прекин на огнот ќе трае само две недели, иако нацртот вели дека паузата во борбите треба да доведе „до постојан одржлив прекин на огнот“.
Амбасадорката на САД Линда Томас-Гринфилд рече дека резолуцијата „изразила поддршка за тековните дипломатски напори“, додавајќи дека преговарачите „се приближуваат до договор за итен прекин на огнот со ослободување на сите заложници, но ние не сме уште таму“.
Резолуцијата, предложена од 10-те избрани членови на Советот, беше поддржана од Русија и Кина и Арапската група од 22 нации во Обединетите нации.
Дел од информациите во текстот се од Асошиетед прес, Ројтерс и Франс-прес
