Играчките се прекрасна работа, играчките го забавуваат детето, го поттикнуваат неговиот развој, а можат да бидат исклучително позитивни и да му овозможат низа придобивки на детето. Но, се чини дека родителите понекогаш (или малку почесто) прават некои работи погрешно, без воопшто да размислуваат за тоа.

Еве како го претставила тоа мајка која е запознаена со едукативните играчки, по поминато искуство со експерти.

„Врвот од посетата на мојот син кај логопед беше торбата со играчки. Пред неколку години, кога син ми беше уште бебе, логопедот доаѓаше во нашиот дом, вадеше играчки од чантата, а мојот син ги следеше внимателно и на тој начин вежбавме да зборуваме. Сакав син ми да напредува што е можно побрзо, па ги запишав имињата на играчките кои логопедот ги користеше во својата работа. Ќе одев во продавница за играчки, но речиси секогаш излегував со празни раце. Се чини дека продавниците за играчки се најлошото место за купување играчки“, вели Џен Чои, мајка на две деца, на својот популарен блог на кој промовира едукативни играчки.

Играчките премногу често се користат како дадилки

Таа наведува дека родителите и продавачите на играчки мора да разберат дека играчката може да биде едукативна само ако детето, откако ќе ја држи, има потреба да поставува прашања и самото да се обидува да одговори на нив. Денешните играчки, сепак, се машини што ги поставуваат сите прашања. Мора да се промени и начинот на кој родителите си играат со своите деца, предупредува Чои. За почеток, тие треба да седат на подот со нив. Премногу често родителите користат играчки како дадилки. Додека децата седат на подот и играат, родителите ги проверуваат нивните е-пораки или ги мијат садовите. Тие сметаат и имаат очекување дека играчката ќе му го привлече вниманието на детето толку многу, што ќе биде хипнотизирано од неа. Квалитетни играчки за родителите се оние за кои се тврди дека децата „не можат да ги пуштат од раце“. Но, сите што мислат така грешат.

Родителите мора да седат на под и да си играат со своите деца

Родителите, велат експертите, мора да си играат со своите деца. Ова е важно за нивната социјализација, компетитивност и иднината во целина. Наместо целото внимание да го фокусираат на „машините што зборуваат“, децата треба да вежбаат да можат да го задржат своето внимание што е можно подолго. Оваа вештина директно ќе влијае врз нивната способност за учење на час, а подоцна и на вештината на зборување на состаноците кога ќе работат, како и на аргументираното учество во дискусија.

Добрата вест е дека има играчки кои се одлични за квалитетно учење. Исто така, постојат голем број активности кои родителите можат да ги применуваат без употреба на играчки. Чои пишува дека и самата правела грешки на почетокот. На пример, со нејзиниот син, додека таа сè уште му читала, никогаш потоа не разговарала за содржината на она што го прочитала. А кога ќе му купела играчка, ја ставала играчката пред него и си заминувала мислејќи дека нејзината улога е завршена. Ако нејзиниот син има проблем со играчката, му велела дека дете на негова возраст треба знае да го реши тоа. Но, тоа што на кутијата пишува дека играчката е наменета за дете од четири и повеќе години, не значи дека четиригодишно дете и шестгодишно дете можат да го прават истото со таа играчка.

Охрабрете го детето да си игра со коцки без ознаки и структури

Коцките, секако, се многу добри едукативни играчки за деца на возраст од три до шест години. Најдобри се оние без никакви ознаки и цртежи, бидејќи ознаките и цртежите само им го одвлекуваат вниманието на децата. За детето е доволен предизвик само да ги нареди коцките во одредена конструкција, без тие да паднат. Експертите посочуваат дека децата треба да се поттикнуваат што повеќе да си играат со коцки бидејќи тие ги зајакнуваат нивните моторни вештини и мускулатурата на горниот дел од телото. Оние мускули што се зајакнуваат на овој начин подоцна ќе им помогнат на децата да имаат подобар ракопис. Колку повеќе децата си играат со коцки, толку полесно ќе биде подоцна да ја разберат моќта на гравитацијата и начинот на кој нешто е структурирано, додека останува интегрирано. Чои, исто така, тврди дека родителите често грешат, така што му ја покажуваат на детето најтешката работа што можат да ја направат со играчка, наместо да му дадат шанса само да дојде до тој заклучок. Ова, предупредува таа, е голема грешка.

Родителите, наведува таа, мора да ги прават токму истите постапки со своите деца како што постапувал и логопедот со нејзиниот син: да седат на подот со децата и да си играат. Во исто време, треба да се опишат дејствијата што ги прави детето, како и дејствијата што ги прави лицето што си игра со него. Исто така, важно е да не го преоптоварувате детето со премногу играчки одеднаш.

Не завршувајте ги вие работите наместо детето

Во играњето со деца треба да се биде трпелив и никогаш да не им суди. Родителот никогаш не треба да прави дејствија наместо детето. Треба да му се дозволи само да дојде до некои решенија, без разлика колку време му е потребно. Чои смета дека играчките со геометриски форми се особено вредни бидејќи тие му даваат на детето чувство на симетрија и пропорција, сето тоа преку игра.

Многу добра геометриска играчка е, на пример, калеидоскопот, цевка со огледала во која има мали шарени предмети, камчиња, мониста или шарени парчиња хартија. Ако не сакате да згрешите и имате пари да заштедите, секогаш опција се и лего-коцките.

Кога детето ќе престане да си игра со играчка, родителите обично ја обвинуваат играчката. Во реалноста, никој не е виновен, бидејќи детето не може да се чувствува креативно и инспирирано, за да игра во секој момент. И кога децата, па дури и возрасните, не се чувствуваат инспирирани, тие сакаат да ја пополнат таа празнина со купување на нешто ново. Чои има предлог – кога ќе видиме дека децата повеќе не се заинтересирани за играчките, едноставно да почнеме самите ние да си играме. Децата спонтано ќе ни се придружат во оваа игра, а дури и подобро е да ги игнорираме и да не ги покануваме во играта. Децата сами ќе дојдат, а инспирацијата ќе им се врати без никаква принуда. Сè што треба да направите е да седнете на подот и да почнете да играте. Секогаш функционира!

Автор: Карина Шиждрак

Извор