Руските сили напредуваа денеска на неколку локации долж бојното поле во Украина, заземајќи подобри позиции во регионот Харков и одбивајќи неколку украински напади, соопшти руското Министерство за одбрана.

Русија контролира околу 18 отсто од Украина, на исток и југ, и напредува по неуспехот на украинската контраофанзива во 2023 година.

Во февруари, рускиот претседател Владимир Путин им нареди на руските сили да се пробијат подлабоко во Украина по падот на Авдијевка, од каде, според него, украинските сили морале да бегаат во хаос. Украина соопшти дека се повлекла од Авдијевка.

Руското Министерство за одбрана соопшти дека руските сили го зазеле селото Семенивка, северозападно од Авдијевка. Русија соопшти дека ги поразила украинските сили и странските платеници во неколку други села во областа.

Украинскиот Генералштаб објави дека украинските војници ги одбиле непријателските напади кај Семенивка и неколку други руски напади.

Руското Министерство за одбрана вчера соопшти дека војниците го зазеле Новобахмутивка, село во близина на Очеретин, кое стана жариште во борбите во последните денови.