За плата од 26.000 денари, без работен стаж и здравствено неосигурeни работат приватните специјализанти во земјава. Многумина од нив по дежурство во болница се приморани да работат и втора работа за да имаат за живот. Друг дел пак кои што доаѓаат од другите градови на специјализација во Скопје мора со тие 26.000 денари  да плаќаат и кирија за сместување и се останато. Токму ваквите услови денеска ги натераа специјализантите да излезат на протест. Разочарани се од тоа колку државата го вреднува нивниот труд. 

„Видете со плата од 26.000 денари а без здравствено осигурување е навистина тешко и недостоинствено, не секој прифаќа и не секој може да издржи во вакви услови, со вакви скромни примања. Се надевам дека министерството за здравство ќе се одважи и ќе се најде решение за нашите проблеми “

„Годините минуваат и наскоро 29 години ќе полнам без ниту еден ден работен стаж. Ништо не се смени. Затоа сме тука, затоа што се надеваме ќе се смени. Кога ја земав лиценцата не си ја замислував иднината дека ваква ќе биде“, вели Беџит Сејфула – специјализант.

„Имаме и приватни семестрални давачки, а сепак се водиме како невработени без ден стаж и тоа шест години и тоа не е само на Клиника за неврологија туку и за сите останати колеги коишто се на приватна специјализација, 26.000 денари мислам дека е под просчена плата за просперетитен доктор, значи или ни останува здравството тука или заминуваме надвор“, вели д-р Радослав Ангелковиќ – специјализант. 

„Без обезбедно станбено прашање во Скопје, за нас од периферијата тоа е најголем трошок, јас доаѓам од Охрид и половина од надоместокот што го добивам јас го трошам за обезбедување живеалиште. “ 

Протестот ги разбуди претставниците на министерството за здравство кои ги повикаа на средба специјализантите. Надлежните инситуции не постапувале според веќе донесените одлуки од 2019 година, па сега ќе се коригираат. 

Но, во меѓувреме осигурувањето им беше укинато без образложение, а платата им остана иста како пред пет години. Инаку станува збор за повеќе од 400 приватни специјализанти кои работат низ клиниките.