Денеска е пролетниот еквинокс кога според астрономијата се одбележува првиот пролетен ден, или рамноденица.
Во времето на рамноденицата, двете хемисфери на Земјата подеднакво ги примаат сончевите зраци. Често се вели дека ноќта и денот се еднакви по должина. Всушност, зборот рамноденица доаѓа од латинскиот aequus (еднаков) и nox (ноќ).
Иако многумина на училиште учеа дека пролетта започнува на 21 март, последните две децении пролетта ни доаѓа на 20 март. Експертите открија дека пролетта доаѓа ден порано веќе дваесет години поради два различни методи за одредување на почетокот и крајот на годишните времиња: метеоролошки и астрономски.
Метеоролозите го набљудуваат падот и порастот на температурата и состојбата на атмосферата, а метеоролошката сезона е координирана според календарот и секоја сезона трае три месеци. Со тој метод пролетта трае од 1 март до 31 мај.
Вториот метод се базира на астрономските годишни времиња, а се однесува на положбата на орбитата на Земјата во однос на Сонцето. Астрономскиот календар ги одредува годишните времиња според тоа кога оската на ротација на Земјата е на 23,5 степени во однос на орбитата околу Сонцето, па така во последните години пролетта ни доаѓа на 20 март.
Првиот пролетен ден во Македонија ќе биде прилично сончев. Слаб до умерен ветер од северен правец, повремено засилен. Според УХМР, највисоката дневна температура на воздухот ќе биде меѓу 11 и 18 степени Целзиусови.
Пролетта го симболизира повторното раѓање на северната хемисфера на Земјата кога сè во природата се буди. Многу култури имаат пролетни фестивали, но Јапонија, Индија и Непал се издвојуваат. Доаѓањето на пролетта се слави со игра и песна, а учесниците на фестивалот си фрлаат различни бои едни на други. Фестивалите ја означуваат и победата на доброто над злото.