• Зоран Мишевски
Македонскиот вицешампион во кошарка, битолски Пелистер, уште еднаш сезонава забележа победа надвор од терените. Со уште една хуманитарна акција, клубот од под Пелистер ги собра симпатиите на спортската јавност.
Директорот на клубот Филип Ивановски и капитенот Дарко Најдовски им подарија спортски реквизити и подароци на штитениците од училиштето за деца со оштетен слух „Кочо Рацин“ од Битола.
„Кошаркарскиот клуб Пелистер уште еднаш покажа дека спортот е повеќе од игра – тоа е заедништво, поддршка и вложување во иднината. Со голема радост ја примивме нивната донација на спортска опрема за нашите ученици, која ќе им овозможи подобри услови за тренинг и развој. Овој гест не само што ќе го поттикне спортскиот дух кај учениците, туку и ќе ги мотивира да се стремат кон успех и посветеност.
Од срце им благодариме на КК Пелистер за нивната несебична поддршка, грижа и емпатија кон децата со попреченост!“, велат од институцијата.
По двонеделна пауза продолжува шампионатот на Македонија, а в сабота во Битола гостува тимот на Вардар.
