Годинашното издание на најпрестижниот моден настан на светот – Мет гала ќе се одржи на 6 мај каде бројни светски ѕвезди ќе ги покажат своите најкреативни модни изданија. Оваа година темата гласи: „Градината на времето“ („The Garden of Time“).

Легендарната уредничка на „Вог“ и модна кралица, Ана Винтур, секоја година го составува списокот на гости, а во една прилика во шоуто на британскиот актер и водител Џејмс Корден откри кого никогаш повеќе нема да го покани на својот настан.

Имено, таа изјави дека никогаш повеќе нема да го покани поранешниот американски претседател Доналд Трамп. Трамп редовно се појавуваше на овој настан уште од 80-тите, а во 2004 година на Мет Гала ја запроси Меланија Трамп со која се ожени следната година.

Винтур не сакаше да навлегува во деталите, но беше јасна во ставот дека никогаш повеќе нема да го видиме на овој настан со ќерките или со сопругата.

Инаку, темата на годинашниот настан го доби својот наслов од истоимениот расказ од 1962 година, напишан од британскиот писател Џејмс Греам Балард. Сижето е сместено во градина исполнета со цвеќиња кои манипулираат со времето. Темата на Балард ја придружува и изложбата на Институтот за костим – „Заспаната убавица: повторното будење на модата“, која ќе може да се погледне во музејот Метрополитен од 10 мај до 2 септември.

Годинашната Мет гала ќе ја водат Зендаја, Џенифер Лопез, Бед Бани и Крис Хемсворт.

Објавена е годинашната тема на Мет гала: Почнува потрагата по најубавата модна креација