Патишта со индуктивно полнење за електрични возила, реалност или илузија? Нов проект во Германија
Израелскиот Electreon и германскиот EnBW се здружиле за опремување на електричен патен систем во должина од 1 км долж германскиот автопат
Toyota предизвика бурни реакции пред неколку години со рекламите во кои ги нарекуваа своите електрични автомобили „хибриди кои сами се полнат“. Но, само замислете дека навистина можете да го наполните електричниот автомобил додека возите.
Последниот чекор кон остварување на тој сон е најавата дека германски автобус во градот Балинген наскоро ќе вози по пат за безжично полнење. Иако проектот вклучува само еден автобус, нема да биде потребно многу време за технологијата да се прошири на други локации низ светот во наредните години.
Минатиот декември, гувернерот на Мичиген, Гретчен Витмер, објави дека државата ќе ги тестира можностите за безжично полнење на своите автопати.
Ако автомобилите можат да се полнат во движење, тие можат да се изградат со помали батерии, што ги прави полесни и поефикасни, а и значително поевтини.
Технологијата за индуктивно полнење на автомобилот работи слично како и нашите паметни телефони. Електричната енергија се пренесува од магнетни намотки во земјата и преку воздухот во друга на автомобилот. Статичните подлоги за полнење постојат веќе некое време, но патиштата за полнење се посложени и се во порана фаза на развој.
За проектот Балинген, израелската компанија Electreon и германската EnBW се здружиле за опремување на 1 км електричен патен систем (ERS) долж дел од германскиот автопат, плус две статични станици за полнење кои ќе бидат инсталирани на точките каде автобусот рутински застанува за време на неговиот распоред. Electreon ќе добие до 3,2 милиони долари (3 милиони евра) средства за изградба на инфраструктура.
Ова не е прв пат да слушаме за патишта со индуктивно полнење, но првпат јавноста ќе има корист од тоа. Electreon и EnBW претходно спроведоа успешна пилот студија во центарот за обука на EnBW во Карлсруе, Германија, а Eurovia и Electreon неодамна објавија проект за електрификација на дел од германскиот автопат во Баварија.
Шведска има свој проект за патишта за безжично полнење, а Stellantis отвори тест центар за симулација на автопат во Италија за проучување на индуктивното полнење.