"Samsung Electronics" ја врати водечката позиција во глобалната продажба на паметни телефони само пет месеци откако му ја отстапи на "Apple".
За потсетување, "Apple" го зазеде глобалното прво место во продажбата на паметни телефони во септември 2023 година, а последователната анализа на целата година ја потврди неговата позиција. Сепак, според "Korea Times", "Samsung" сега се вратил на тронот. Врз основа на податоците за февруари 2024 година, публикацијата известува дека "Samsung" постигнал удел од 20% од глобалниот пазар.
Во истиот месец, "Apple" имал 18%. "Apple" продал 17,41 милион "iPhone" телефони, додека "Samsung" продал 19,69 милиони смартфони.
Но, според "Apple Insider", ниту "Samsung" ниту "Apple" всушност не можат да се пофалат дека се број еден, барем не предолго, имајќи предвид дека често ги менуваат позициите. Овие промени најмногу се поврзани со лансирањето на нови уреди, кои, логично, поттикнуваат скокови во продажбата.
Така, првото место на "Apple" во септември 2023 година се должи на лансирањето на серијата "iPhone 15", а "Samsung" победи во февруари поради лансирањето на најновата серија "Galaxy S24". "Korea Times" објави дека "Samsung" досега има продадено 6,53 милиони телефони "Galaxy S24" на глобално ниво.
Преземањето на првата позиција од страна на "Apple" во текот на 2023 година, секако, може да биде позначаен податок. Имено, во текот на целата година "Samsung" најчесто има предност во однос на "Apple" бидејќи продава многу повеќе различни модели на смартфони во различни ценовни рангови.
Но, генерално, продажбата на паметни телефони е во пад низ целиот свет, особено во Кина. "Apple" сè уште беше на врвот на листите во Јапонија според најновите податоци од март 2024 година, но и тој пазар се намали.
