Најмалку четворица работници загинаа вчера во експлозија во хидроелектрична централа на вештачко езеро во северна Италија.
Властите стравуваат дека бројот на жртвите во хидроелектраната на езерото Сувијана меѓу Болоња и Фиренца може да се зголеми. Неколку часа по несреќата, која се случи околу 15 часот, тројца работници сè уште се водат како исчезнати, а најмалку пет работници се здобиле со изгореници.
Од засега неразјаснети причини пожарот избувнал во хидроцентралата додека се работело на турбината на длабочина од околу 30 метри, што според првичните информации ја предизвикало експлозијата. Како последица на експлозијата во електраната навлегла вода.
Самата брана, оддалечена околу два километри, не беше погодена. Густиот чад го отежнувал пристапот на пожарникарите на местото на несреќата.
Градоначалникот на блискиот град Камуњана, Марко Масинара изјави дека се работи на турбините и дека несреќата се случила под нивото на водата, односно на минус девет.
Сопственикот на хидроцентралата, снабдувачот со електрична енергија Enel, ја потврди несреќата, но не соопшти детали.
Противпожарна бригада беше распоредена со повеќе од 40 доброволци и неколку хеликоптери.
„Има многу чад. Се бориме да влеземе во просториите“, изјави за телевизијата E-TV Калогеро Туртуричи, командант на провинциската противпожарна бригада на Болоња.
