Глуво девојче повторно слуша благодарение на револуционерна генска терапија
На глуво девојче од Британија ѝ беше вратен слухот по првата светска, револуционерна генска терапија. Опал Сенди (18 месеци), од Оксфордшир, е родена целосно глува поради аудитивна невропатија предизвикана од прекин на нервните импулси кои патуваат од внатрешното уво до мозокот.
Сега, благодарение на генската терапија која се тестира во Велика Британија и ширум светот, слухот на девојчето е речиси нормален и би можел уште повеќе да се подобри.
Професорот Манохар Бенс, хирург и главен истражувач во случајот, изјави за новинската агенција ПА дека резултатите се „подобри отколку што се надевав или очекував“ и потенцијално може да излечат уште пациенти со овој тип на глувост.
Тој рече дека „имаме резултати (со Опал) кои се спектакуларни и многу блиску до враќање на нормалниот слух. Затоа се надеваме дека тоа е потенцијален лек“.
Аудитивната невропатија може да биде предизвикана од грешка во генот ОТОФ, кој е одговорен за создавање на протеин наречен отоферлин. Ова им овозможува на клетките во увото да комуницираат со аудитивниот нерв. За да се надмине грешката, генската терапија „нова ера“ која ја развива биотехнолошката компанија Регенерон вметнува активна копија од генот во увото.
Во овој случај, девојката примила инфузија која содржи активен ген на десното уво за време на операција во септември минатата година.