Безуспешен обид за грабеж во населбата Бутел рано утринава. Банкоматот бил поставен на паркинг пред маркет на улицата Христијан Тодоровски Карпош. Полицијата во координација со обвинителството неколку часа вршеше увид на самото место додека тој дел од улицата беше затворена за сообраќај.
Обидот за грабеж бил неуспешен. Од силната експлозија уништен е целиот банкомат а оштетени се и неколку возила.
Колкави се штетите и дали во банкоматот имало пари ќе се знае откако ќе заврши увидот. Од полицијата засега не откриваат повеќе детали.
-Во СВР Скопје е пријавено дека на подрачје на Бутел четири лица кои дошле со возило, поставиле експлозивна направа на банкомат и се обиделе да одземат пари, но не успеале. Од детонацијата се оштетени три возила. Нема повредени лица. Во тек е увид од полициски службеници и се преземаат мерки за расчистување на случајот.
Сличен обид но со успех имаше во декември во Топанско поле. Тогаш најмалку четворица разбојници поставија експлозив на четири банкомати на различни банки и украдоа поголема сума на пари, а чуварот на паркингот пред трговскиот центар беше нападнат. За сега нема информации дали и овој случај е целосно расчистен.