Полицијата рано утринава евакуираше пропалестински камп на Универзитетот Џорџ Вашингтон во американската престолнина и апси десетици демонстранти.

Градската полиција објасни дека првично се обидела да ги „смири тензиите“ пред да интервенира.

Околу 04:00 часот по локално време, полицајци интервенираа во кампусот и употребија бибер спреј против демонстрантите, како што објави студентскиот медиум GW Hatchet, при што беа уапсени десетици.

Полициската операција дојде во моментот кога се очекуваше градоначалникот и началникот на полицијата подоцна денеска да сведочат пред Конгресот за нивното справување со студентските протести.

Тоа рочиште беше откажано поради евакуација на кампот, изјави Џејмс Комер, републикански член на Претставничкиот дом.

Американските универзитети со недели ги потресуваат протести против израелската војна против Газа. Низ целата земја, органите за спроведување на законот беа повикани од универзитетските администрации да ги евакуираат камповите и насилно да ги отстранат демонстрантите.