Зголемувањето на минималната плата на 500 евра ќе го зголеми и процентот на работници кои ќе бидат на минималец, а сега не се, смета професорот Лазар Јовевски. Според Јовевски, кој е и советник по труд на премиерот, зголемувањето на минималната плата повлекува и зголемување на останатите плати, посебно на оние кои се под или малку над новиот минимум, па од сегашните 5 проценти, бројот на работници со минимална плата ќе скокне неколкукратно, што не е добро за економијата.

Првиот синдикалец Слободан Трендафилов, кој во последните неколку дена трпи жестоки критики од власта дека ги застапува интересите на опозицијата, не остапува од барањето за зголемување на минималецот на 500 евра, а разликата за придонесите од сегашната до идната минимална плата да ја плати државата.

Владата не сака да слушне да субвенционира придонеси, а ставот дека ги остава работодавците и работниците да се договорат и тоа ќе го поддржи, го повтори и денеска. Министерката за финансии Гордана Димитриеска Кочоска тврди дека Владата не е во војна со синдикатот.

Од 1 март минималната плата се зголеми за речиси 2000 денари, со годишното усогласување кое зависи од порастот на трошоците за живот и инфлацијата. Синдикатите велат дека тоа е премалку и бараат зголемувањето да изнесува 100 евра, колку што изнесува зголемувањето на минималната кошничка од лани до сега.